منتدى نبض القلم.. للشعر والأدب

مجدوبيات هواري
زجل

###### دموع الحال #######
بقلم الشاعر عبدالله الهواري

العين مابقى لها غير تبكي دم
والقلب طاب مابقى يتحمل زيادة
الناس تفتنات من الراس لگدم
وكلها ف غيو بلعاني يتمادا
كتروا الملدات والحال تگهم
المناكر فرضت راسها ياسادة
العربي بخوه يبرگگ ويشكم
مابقات خاوة ياويل هدا من هدا
يصلي ويصوم وينافق مايحشم
تبدلت النية وطقوس العبادة
القاضي من غير بينة يحكم
زوروا المحاضر وغيروا الشهاذة
المظلوم الا شكى اليوم يتعدم
والظالم يوشحوه بوسام گلادة
نشف بير المحبة  وكح وتردم
على قلتها حاجة الناس تتعادا
الخير فالاخير حالف يولي سم
الجحود والنكران فالانسان عادة
بالنفس الامارة والشيطان تحزم
وبالخديعةوالمكر الوقت غادة
أمرنا زاد عواج  ما بغى يتسگم
تفقدوا المعلمين بقاوا غير الردادة
ياربي سألناك ألطف بعبادك ورحم
البركة ترفعات والاصلاح تقادا
لله سعفوني راني من الحر نتكلم
وكلامي ماعاد ينفع ولوفيه إفادة.

بقلم عبد الله الهواري
30/03/2019