منتدى نبض القلم.. للشعر والأدب

***أنا الحرة ...أنا الأبية .....
بقلم الشاعر فوزية بوقريان

ما تْقُول لي عيد المرا 
ما تْقُول لي عيد النسا
أنا عيادي جوج 
فيهم الصلا وفيهم الزكا 
أنا نفسي عزيزة 
مانرضى بيوم نادات بيه
مجموعة من النسا 
الظلم غلفها ؤعانات من القهرة
ماتضحك علي يا رَّاجل 
بيوم ؤغذا تعطيني بالكفا 
ماتمدحني ف 8 مارس 
ؤف 9 يبدا الجفا والهجا 
ماتعطيني بيدك وردة 
ماتهنيني بحروف
ؤمورا ظهرك هاز العصا
بغيتك تحتارمني 
بالفعل ماشي بكلمة 
مْزَوْقَة مْدَرْكْهَا الصْدَا 
أنا مْرَا ؤُلَالاَت النسا 
عْزِيزَة بسنة حبيبي المصطفى 
لي نْقْذْنِي من ايد الجهل
الناكر لجميلي ؤلكرامتي
ماصانها ولا تْفَكّْر لْعشرا
عرفتيني أرَّاجل شكون أنا ؟
أنا عائشة أنا  خديجة 
أنا سودة وأم سلمة 
أنا عندي لْخريف ؤُرْبِبع 
ؤالصِّيف ؤُحتَّى الشتا 
كلها يَّامي فيها نْجُول ؤُنْصُول 
ولْجراح معايا ديما تْبْرَا ....
سمحي لي حبيبتي لْمرا 
إلا نْزْعْتْ مْنّْك فرحة ْليوم 
را غير خذاتني عليك لْغيرة
حنت أنا ونْتِ ماسْ مْصْقُول 
ماشي نْحاس ماشي قْــشْرة 
واش عرفتي أرَّاجل شكون أنا ؟
أنا الأبية ...أنا الحرة ....أنا المرا..
*******************
بقلم فوزية بوقريان