الشغلة مو بالعصبية
بقلم د.ملك محمود الأصفر
من شان قهوة وكاسة شاي
بيعمل عراضة القبضاي
بيعمل عيطة بيعمل زيطة
وبيورجي الرايح الجاي
مابيسوى هيك ياحباب
تعمل ببيتك إرهاب
ترأف بمرتك وولادك
لاتفتح للشر بواب
...................
ولادك هنن قرة عينك
ومرتك بتكملك دينك
أوعك تعمل رب عليهن
هنة الأساس بعرينك
الشغلة مو بالعصبية
لأنا نقص رجولية
الرجولة بتعني الشهامة
وتحمل المسؤولية
....................
عامل مرتك متل رفيقك
خليها تحبك وتطيقك
ولادك عاملهن بمحبة
أوعا تطيرهن من إيدك
وبيتك خلي أسرارك
وحل مشكلتك جوا بدارك
أوعا تطالع سرك برا
أو يوصل صوتك لجارك
....................................
د . ملك محمود الأصفر
ليست هناك تعليقات:
إرسال تعليق