كون زجال للشاعر محمد الشافعي

كون زَجَّال
بقلم الشاعر محمد الشافعي
كُونْ زَجّــــالْ وعَقْلَكْ صَنَّارَة
صَيَّدْ ٱلْمَعنَى مَنْ جَوْفْ ٱلضَّايَة.
جِيبْ كْلامْ هَــــادفْ
عنْـــدو ذَوْقْ وغَـــــايَة
خَلِّي لْسانَكْ بِيهْ يصِيـح
ٱرْكَبْ صُربَتْ لَقْصِيدَة
كُونْ عَنْدْ ٱلنَّدْهَة مُوجُودْ. 
كْلامكْ حَبَّة وبَـــرُود 
وسْلاحَكْ لْسانكْ لَفْصِيح.           
يكونْ كْلامَكْ حَضْرَا 
ولمَّلَّع بَسْواكَنْ لكْلامْ 
عْلى شْطِيحَكْ يْطِيح.
كُونْ حرَايْفِي فَعْبَار ٱلْهَدرَا
تصــون وزان كْلامَـــكْ 
وتَطْلَقْ نْغامُو للرِّيح.
المالَكْ وذْنِينْ ٱلنَّغْمَة
يلْقَمْ لْغاكْ فينْمَا 
ٱلْبَرْدْ بِيهْ يجِيح.
طْــرزْ كْلامكْ عَ ٱلْورقَة 
يْقامَة وِيدَامْ مَرقَة 
خَلِّـــي لِيدَامْ يسِيح.
وِيلَى حَرفَك بْلَغْ أُوَلَّى مَتْرُوفْ
وبْغَى بَينْ لَحرُوفْ يطُوفْ 
أنا ياسِيدِي عــــاطِيهْ ٱلتَّسْريح.
                   محمد الشافعي