رغم ال(ايمو) بعد( تويتر )
(والفيس بوك )مع (اليوتيوب)
والقنوات اللى معدية
الف ومية غير المشطوب
بس انا لسه بحكم البيئة
قروى ف قعدة غيط بيدوب
تحت التوته وقدام ترعه
بحكى معاها برمى الطوب
وتبوس طوبتى خد الميه
بوسة عاشق للمحبوب
القى ف خجل المية دواير
خلت عقلى صبح مسلوب
كانها جاية على بتجرى
لجل ماتهرب م المكتوب
بس الشط منعها تعدى
كانه الدرع ف وقت حروب
خدته الغيرة ياناس بسلامته
وقالها دلعك مش مطلوب
سيبك من عنتر ياحبيبتى
واسكنى حضن الواد شيبوب
قام براد الشاى من غيظه
قال له اكيد شيبوب مغلوب
تقلع عينك ....تقلع عينها
برضه الحب ساكن ف قلوب
وسط الخضرة بتستناها
تصبح للمزروع مشروب
ضحك الشط وقال له عرفنا
دايما كده بلسان مسحوب
سلم على فلاح اناعاشقه
من طلعتها لحد غروب
فيه بيروح بس مشاعره
بتخطط ف الليل لهروب
علشان تيجى تزورنى ثوانى
م المحبوب ف الهوى مغلوب
لوحة الريف ولاحتى دافنشى
يقدر يرسمها ف مكتوب
داللى رسمها رب القدرة
صنع المولى مفيهش عيوب
ليست هناك تعليقات:
إرسال تعليق