عَ الرَّصِيف
بقلم الشاعر أحمد شاهين
مَا يْحِــس بِيــك إِلاَّ اللي زَيَّــك
وِاللي دَاق طَعْــــــــم الْمَـــرَار
وِمِين هَيْحِـــس أَصْـــــــــــــلاً
غِير اللي قَاسَى عَـذَاب وِنَــار
هُــوَّ اللي هَيْمَيِّـــــــــــل عَلِيك
هُــوَّ اللي لِيك ضَهْــــــر وِدَار
وِانْتَ اللي عَايِش عَ الرَّصِيف
مَهْمُـــــوم وِقَــاتْلَك الانْتِظَـــار
مِسْتَنِّي جَنَّـــــــــــــــــه تِلْمِسَك
مِسْتَنِّي لَحْظِــــــــة الانْتِصَـــار
فَجْــأَه تِــلاَقِي بَـــــرْد بِيِلْسَعَـك
فَـــارِد عَلَى العَضْـم الحِصَـــار
وِالضُّهْر شَمْـــــــس بِتِلْفَحَـــك
بِتْعَــانِي لِيــل وَيَّــــا النَّهَـــــار
لاَ بْتِشْكِي هَمَّــــــك لِلزَّمَــــــان
وَلاَ انْتَ قَـــادِر تَاخُـــد قَــــرَار
يَا اللي انْتَ عَنْدَك فَضْل مَــال
مَيِّــلْ عَلَى اللي دْمُــوعُه نَـــار
سَــاعِد غَــرِيب عَن دُنْيِتُــــــــه
خَلِّيك مَعَـــــاه في التُّوهَه بَــار
مَا يْحِــس بِيــك إِلاَّ اللي زَيَّـــك
وِاللي دَاق طَعْــــــــم الْمَــــرَار
وِمِين هَيْحِـــس أَصْــــــــــــــلاً
غِير اللي قَاسَى عَــذَاب وِنَــار
ـــــــــــــــــــــــــــــــــــــــــــــــ
كلمات الشاعر أحمــد شـاهين
------ مصر -- أسيوط ------
