شريط لمكتوب.............................................
ربطاتني ليام بي شريط لمكتوب
ما فقت حتا لقيت راسي مكبل
كل شي لي سمعتو كان كذوب
عقلي طار مني و قريب نهبل
بيا دارت ليام وليت مغلوب
السراب لي تبعتو كان غير سنبل
نور الشمس على عيني ولا محجوب
خيط عمري اليوم ولا مخبل
عمرو وراق كتابي معاصي و ذنوب
فوق كتافي وليت هاز جبل
الزمان غدرني عليا لعب لعوب
الورد في جناني كرم و ذبل
غابت شمسي غربات غروب
بعدما كانت ساطعة من قبل
تخاصمت آنا و الزهر و لمكتوب
حتا الزلط عليا ما بقاش يقبل
ليام عندي ولات غادية بلمقلوب
عييت آنا مليت قريب نجفل
ما نفعني لا طبيب لا فقيه لا سبوب
مال زهري آنا مالو مكبل
واش مكتوبي آنا مكتوب
بعدما كنت طالع ليوم ننزل
واش نعطي راسي للهم و لا للمحبوب
لي نساني و ليوم عليا تبددل
خممت نخوي بلاد لبلا و نتوب
نعمر طريق الله و عليها ما نبقاش نغفل
بقلمي : عزالدين العودي ناس الرمى خريبكة
Le 26/02/2019