صرخة لاجيء للشاعر برصوم كساب

صرخة لاجئ 
بقلم الشاعر برصوم كساب
هاجرت أرض الوطن من سطوة الارهاب .. 
وأصبحت لاجئ بأرض الله مسكوني . 
حسبت حالي بوطن أهلي من الأعراب .. 
وطلعت سلعة تآمر وبالرخص باعوني . 
وعم لوك مر وأسى وفتش عن الأسباب .. 
ما لقيت الا العرب بالكذب خدعوني . 
ودمعي انسكب وانصب عالأحباب .. 
لما الأجانب أحصوهم وأحصوني . 
بخيمة لجوء سكنت واسمع حدا بالباب .. 
بي عد أرقام ورقم مليون أعطوني . 
وصار الندم بالفكر ياكل من الأعصاب .. 
وصوتي رعد بالرفض أوعى تهدوني . 
رح حط بعض النقط تنصحح الإعراب .. 
ولو كان صوتي هدر أوعى تلوموني . 
سوري أنا وماني رقم بكتاب .. 
ورح صيح فخري وطن أغلى من عيوني . 
وراجع أنا يا وطن لو عيش عالأبواب .. 
وآكل ترابك بدال الخبز والموني . 
حدودك كرامة وشرف برا وهم كذاب .. 
وروحي إلك يا وطن بالدم مرهوني .  

       برصوم كساب