لحظة ود ...بقلم الشاعر مصطفى فريد

لحظة ود
من ديوان / البيت القديم 
للشاعر/ مصطفى فريد

أنا إللى الدنيا عاندتنى
لأبعد حد
ومن أفراحى حرمتنى
وطريقى إنسد
ويوم ما جاتنى صالحتنى
هزمنى الوجد
لقيت الحب واخدنى
شاددنى شد
جوه طريق ملخبطنى
وهدنى هد
سقانى الويل وسهرنى
فى صد ورد
أنادى لحد يسمعنى
ماحدش رد
أجيب مين بس ينصفنى
وعمرى إتمد
فى سكة شوق بتخطفنى
ما شفتش حد
يواسى الدمعة فى جفنى
فى لحظة ود
طريق الحب ضيعنى
وتهت بجد
عسل كدبك مغرقنى
يا دنيا المجد
موج احساسى يحدفنى
فى جذر ومد
سمعتك صوت بيندهنى
خدعنى الصوت
وفات القلب يوجعنى
لحد الموت
لقيتك بكر خطفتنى
وبنت بنوت
ولاجل طمعها خدعتنى
وأنا مش ند