الغُربة..
بقلم الشاعرة منال عبد الهادي
انا اللي الغربة عشتها
وايام م الوحدة شفتها
تدوس ماترحمش
تكسر ما تدلعش
سنين عايش وحداني
اقول الكلمة ف أحلامي
وصداها اسمعه من تاني
نسيت اللمة والعيلة
ومين يساعدني ف الشيلة
احلم بضحكة ف حضنهم
وأخاف يعدي وقتهم
وارجع والوقت متأخر
وكنت فاكر انا الاشطر
اتاري الوقت عدى وفات
وجيت اسال قالوا مات
دفعت ياغربة التمن بزيادة
وبرده ما كفى يشتري سعادة
اياكي يا غربة تنسيني
وتنكري كل عرق م جبيني
عايش جواكي وتنسي ازاي
وانا عمري ما هكون نساي
دا كل شارع ليية فيه قصة
وع جدرانه رسمت كام رسمة
عدت سنين تعبت من عدّها
أيام كتير مليت من وصفّها
انا اللي هناك اسم و تأشيرة
ساقيةوبتدور ملهاش تأخيرة
ويدوب كلمتين واهي تصبيرة
منال عبد الهادي