منتدى نبض القلم.. للشعر والأدب

وحشتيني ...
بقلم الشاعر عادل محمود
♡☆♡
أقولك ايه .. واعيدلك ايه
واللي انا فيه ..
مكتوب ملامحه على جبيني
وكل ما فيا .. بيصرخ فيا
بدموع عنيا ..
وصوت مخنوق ..
وحشتيني ......
غيابك نار .. وقلبي ف نار
وليل ونهار
راميني لنار بتكويني ..
حتى ابتسامتي .. من يوم ما غيبتي
راحت .. وصمتي ..
مطرح ما اروح مستنيني
بعدك كاسرني .. و آلمك واجعني
وانا مصبرني
أملي في الله .. ويقيني
حاسس بآلمك .. وغصب عنك
لقيته واخدك
ولوحدة قاتلة بيرميني
اشتاق لصورتك .. همسك وعطرك
اقرا رسايلك
واضيع في حرفك يواسيني
أغمض عنيا .. واشوفك جاية
بتجري عليا
واخدك ف حضني يا نور عيني
ربي يساعدك .. ويزيل آلمك
وقلبي اللي حبك
مستني بأمل يوم ما تجيني ..
وحشتيني ...
بقلمي / عادل محمود ....