سيدنا البارون
من ديوان / سنين المخاض
للشاعر / مصطفى فريد
عجايب علينا. زرعنا بإيدينا
شقانا ومرارنا
وقولنا انتصرنا. غزينا قمرنا
وسكة سفرنا
لبكرة وحاضرنا. عشان يفتكرنا
نحفر قبورنا.
وندفن ضميرنا. ونخفى فى صدورنا
قلوب من رخام
وجوه الزحام. وباء الخصام
فرقنا وغام
وعام بعد عام. أبونا الإمام
غرقنا وعام
وساب اللجام. فى إيد عم سام
وقال مش حرام
فى عصر المصالح. نسن اللوايح
وقال عم صالح
مادمنا فى لوايح. مجرد صفايح
خزين له روايح
من الآن ورايح. ح نفصل دبايح
لبوش أو شارون
وفوق الكانون. بيغلى الماعون
وجاهزة الصحون
ومطلوب نكون. بميت ألف لون
فى ظل القانون
دمانا تكون. هديه فى جالون
لسيدنا البارون