منتدى نبض القلم.. للشعر والأدب

جَرَى إيه ياناس
بقلم الشاعر محمد عناني 

كل الكلام حُب وهيام
جرى إيه ياناس
بقت حياتنا كلها عِشق وغرام
ولا مشاكلنا خلاص
واصبح كل شىء عندنا حلو وتمام
بِجد حاجه مُلفِته
وف حياتنا مُحيِره
أقدر أقول حَاَله عجَب
وعندى لِيها مِيت سبب
دا احنا حياتنا مِكركبه
مِتلخبطه مِتشَبِكه
بالرغم من كل المشاكل والدواهى
والمصاعب كلها وحتى التلاهى
واللى فاهم واللى ساهى
واللى سهران ليله كله ف الملاهى
تِلقا منا كتير يِسَبِل
أو ف الغرام قَاَعِد يِهَبِل
ممكن صُغَيَر أو كبير
إن كان غَنِى ولافقير
نازلين فى حب ومَِعمعَه
وبيوتكو مِنه مِخَلَعَه ومِهكعه
الحب حاجه مش حرام
لما يكون فيه إحترام
وصِدق ويَاه إحتِشَام
عاوزينه برضو بالأصول
مِش أى حد وأى قُول
وياريت كَمَان لِلأُسره دور
مِش مِن وراها نِروح نِدُور
ألفاظنا تِبقَى مُهذَبه
من غِير مِيُوعه وسَهوَكه
مُمكن شبابنا يِزعَلوا
ومِن كَلامى يِقللوا
أو يِقُولوا راحت عَلِيه
والحب ضاع من بين أيديه
الحق برضو عندكم
لكن وِلادى ف سِنكم
وأنا بأقول عشان ولادى
اللى أغلى من حياتى
والنصيحه بِجَد وَاجِب
رب العباد بكرا يِحاسِب
============
( محمد عنانى )